Pacolli: Mirësia nuk humb kurrë, por dhemb kur nuk vlerësohet

Ish-presidenti i Kosovës, Behgjet Pacolli ka shpërndarë një mesazh reflektues dhe emocional në rrjetet sociale, ku flet për ndihmën që u ka dhënë të tjerëve, mungesën e mirënjohjes dhe fuqinë transformuese të mirësisë.

Pacolli tregon se, ndonëse nuk kërkon lavdërime për veprat e tij, e ka ndjerë si dhembje mohimin e ndihmës që u ka dhënë disa njerëzve në të kaluarën, shkruan Arbresh.info

“E kam mbulu n’kujtesen time, por duke shfletuar disa materiale të ruajtura, e pash sa kujt i kam dal në ndihmë,” shkruan ai. “Kurr mendja nuk më ka shkuar dhe për asnjë rast nuk jam penduar dhe as nuk kërkoj dekorata për atë që kam bërë.”, u shpreh ai.

Megjithatë, ai nuk fsheh zhgënjimin përballë atyre që kanë treguar mosmirënjohje.

“Por, mosmirënjohja dhe mohimi i ndihmës dhemb. Dikush me të drejt mund të pyet po s’i ja bën, thjesht ju them se e kam kuptuar se mirësia bën çudira me të gjithë – përveç atyre që nuk e njohin dhe nuk e vlerësojnë.”, tha Pacolli.

Në përfundim, Pacolli nënvizon se, pavarësisht vlerësimit apo mungesës së tij, mirësia mbetet një vlerë që ia vlen të jetohet:

“Disa mbeten të pandikueshëm sepse thjesht nuk janë miqësorë me mirësinë. Një kujtesë për të gjithë: bëni mirë, edhe kur nuk vlerësohet – sepse mirësia nuk humb kurrë, ajo thjesht ndryshon ata që e kuptojnë. Të premte të begatshme dhe fundjavë të mirë”, tha në fund Pacolli./Arbresh.info