Fryma poetike e së mërkurës me poetin:- Hatip HULAJ

NË OBORRIN E SHTËPISË SË VJETËR

—————————————————

Erdha në oborrin e shtëpisë së vjetër, nënë.

Shikova nga dritarja e dhomës së ndejës,

xhami i thyer ishte mbuluar me avull,

asgjë nuk pashë brenda.

Jashtë qëndronte lisi ,aty ku pushonte babai,

edhe bastuni nuk ishte i varur nē gozhdë-

dikush e kishte marrë.

Dy pika shiu më ranë në faqe:

nuk e kuptova a ishin lotët e tu,

apo të mijtë që s’i ndala dot.

U zmbrapa , më zuri këmba në barishtet e thara.

Mollët kishin rënë përdhe,disa ishin kalbur.

Ne ikëm në qytet,

por fëmijet na ikën në kurbet.

Shtëpia mbeti e zbrazur në fshat ,

dhe banesa e heshtur në qytet.

/QendraPress/