Çaste poetike me poeten;- Luljeta F. LUBOVCI

Rrobat elegante sonte i vesha

————————————–

Rrobat elegante sonte i vesha,

si atë natë që më the “je e bukur”,

era sillte aromën e trëndafilit,

e drita dridhej në sytë e tu të butë.

Në hapat e mi ndjej përsëri muzikën,

atë vals që s’u harrua kurrë,

fustan i njëjtë, por pa dorën tënde,

që më mbante lehtë, si një lutje e bukur.

Kujtimet më prekin supet ngadalë,

si duar që s’kanë më trup,

por kanë mbetur në ajër si aromë nate,

në një sallë ku hesht dashuria.

Rrobat elegante sonte i vesha,

jo për dikë tjetër, por për atë kujtim,

se disa netë s’kthehen më kurrë,

por jetojnë në pëlhurën e shpirtit tim.

/QendraPress/