Çaste poetike me poeten:Lulëzime MALAJ

Ç’natë groteske

———————————-

Tutje shtyn fshesat e erës, vjeshta,

Oborrin nga gjethet, sikur e pastron,

Tundet në gardh një shami me hojna,

Si flamur i bardhë, sikur paqe kërkon.

Një degë arre më troket në xhame,

Zgjohem e trembur dritaren e hap,

Shoh vjeshtën nudo veshur nallane,

Çative, sokaqeve natës me vrap!

Rreth strehës stuhia shkulmat vërtit,

Aty sikur shfryn e derdh gjithë inatin,

Lotojnë qiejve e s’gjejnë rehat fletët,

Dhe tokën mbulojnë, si fletë kalendari!

I xhindosur lumi përmbyt vreshtat…

Merr para deg’ e fletë… kuturu,

Tutje pyllit e trembur struket vjeshta,

E mbytur në lot fshihet diku!

Ç’natë groteske, kjo natë e ujshme,

Kullojnë gjinjtë e qiejve nën astar,

Hëna si magjistrickë e padukshme,

Në degën lakuriqe të arrës u var!

/www.QendraPress.com/