Fryma poetike e së premtes me poeten;-Margarita Llapushi ZENELI

Ëndërr brenda ëndrrës..

———————————————-

S’ di në ç’galaktikë sytë tanë lundruan

një golfstrim dashurie detin turbulloi,

fije shpirti u zgjidhën, oh ngelën pa nyje

varka e kuqe detin thellë përvëloi!

Dimri i acartë s’ia ndali dot vrullin

flakës që po digjte si bar akullin jashte,

akrepat e orës mallkonin ndryshimin

qanin edhe qeshnin ,në fund, rrinin bashkë!

I trembur si kaproll, gjumi vrapoi ,iku

me sytë vrarë lotësh ëndrrës seç i lutej,

më merr ti në krahët e parajsës tënde

të digjem në diell, e pastaj të zhdukem!

Yjet lart në qiell u përskuqën flakë

ca ashtu nga turpi, shumë të tjerë nga zjarri,

grinden nëpër ditë e qeshin nëpër natë

hënën e përgjonin, kur dielli puthte mallin!

Gjithë bota fikej, larg në sytë e ëndrrës

fenerët e shpresës ndizte si far zemra,

në venat e shpirtit çakërdisur ndjenjat

bota jonë e madhe, botë e vogël brenda!

//www.QendraPress.com/