Fyma poetike e së mërkurës me poeten;-Drita Rubjeka ZENELI

Bastuni i kohës

——————————-

Më janë rrudhur mendimet,

Përpiqem t’i mbaj me bastunin e kohës.

Një faqe libri mëngjeseve,

Për të hapur dritaren e ditës.

Një filxhan kafeje

me ty,

Nuk më numëron vitet,

Më flladit buzëqeshjet,

Në duar më dhuron diell.

Mandej eci ngadalë,

Rruga është po ajo,

Po aq e gjatë sa më parë

Por tash ja dëgjoj heshtjen.

Ndonjëherë udhëtoj më gjatë,

Nuk jam në garë me kilometrat,

Garoj me copëza të vetes,

Nëpër damarët e stacioneve të jetës.

Mbrëmjeve argëtohem,

Vallëzoj në dhomëzat e kujtesës,

Miqësive të vërsës, me një këngë, një poezi,

Me një gotë bisede, që zgjat sa nata.

Bastuni im i kohës

nuk është druri mbështetës,

Është gjithmonë një libër,

Është lëvizja akrepore e orës në udhëtim,

E qeshura ndër miq që nuk pranon të plaket…

/QendraPress/