Kryeministri i Kosovës, Albin Kurti, ka reaguar përmes një postimi në Facebook pas një shpërthimi të ndodhur pranë Liqenit të Ujmanit.

Sipas informatave të Policisë së Kosovës, rreth orës 14:30 në zonën e njohur si “Te tuneli i pestë”, në rrugën magjistrale të liqenit, një ose më shumë persona të panjohur kanë hedhur një granatë dore, duke dëmtuar dy vetura të parkuara, njëra me targa vendore dhe tjetra me targa amerikane. Njësitë policore kanë shkuar menjëherë në vendngjarje dhe po hetojnë rastin. Në reagimin e tij, Kurti ka theksuar se ky incident tregon se stabiliteti në Kosovë nuk i konvenon Serbisë dhe disa shteteve mike të saj. “Serbisë dhe qarqeve të caktuara mike me të, nuk iu levërdis normaliteti i krijuar në atë pjesë të vendit tonë. Duke e humbur ndikimin në këtë zonë, nervoza u bëhet agresivitet. Edhe grupe të ndryshme kriminale, pak a shumë të lidhura me të, kanë humbur mundësinë për përfitime enorme çfarë i patën për më shumë se dy dekada që nga çlirimi i Kosovës. Kjo është e dhimbshme për ta dhe vështirë e pranueshme”, ka shkruar Kurti.Ai ka theksuar se rrugë tjetër nuk ka përveç sundimit të ligjit dhe rendit publik “Siguria dhe paqja janë vlera themeltare dhe interes i përbashkët i shoqërisë dhe qytetarëve bashkë me shtetin e Kosovës. Patjetër që institucionet e sigurisë, marrë për bazë profesionalizmin bashkëkohor dhe vullnetin e palëkundur, do të zbulojnë aktorin apo aktorët e këtij sulmi kriminal dhe do t’i sjellin para drejtësisë. Kjo pjesë, ashtu si të gjitha tjerat të vendit tonë, me potencialin dhe bukuritë e saj do të përdoret nga të gjithë qytetarët pa dallim,” ka përfunduar ai.Shpërthimi dhe dëmet e shkaktuara në Liqenin e Ujmanit kanë ngritur shqetësime të mëdha për sigurinë në veri, ndërsa institucionet e Kosovës janë angazhuar për të hetuar dhe sjellë para drejtësisë personat përgjegjës…..