E diela me poet të veçantë; Sabit Rrustemi

Ars nata …

PATJETËR TEK TI DO TË VIJ

– variant –

Do të kthej kah Ti

kudo që je

të të shoh

në je zgjuar

në je shkundur nga kjo kohë

e nga ky shi

nga mungesat që sjellin mërzi

Do të kthej do të kthej

e do të gjej kudo që je

edhe kur rrugë të shumta

përftojmë syve

bëjnë dredhi

Veten time dua ta shoh

nën ata sy

në jam ky që e di

ai mali i njomë mbi timen shpi

Një sopatë e ndryshkur

bishtajur

shpinën pakëz ma ka thy

dhe malli për ty

Do të dal andej

patjetër tek Ti do të vij

me veten time që banon aty

një kafe ta pij

thinjat e pritjes t’i dëboj përsëri

( 30 Maj 2012 )