Çaste të së dieles me:Ramije Ukaj
ORA PA NUMRA
Mbaj mend një kohë pa orë
Ku para luleve më zinte gjumi
Me rreze të para zgjohesha
Dhe vrap nisesha kah lumi
U rrita me cicërima të bilbilit
Nën ujëvarën e Korishës
Kohën e matja me hijen time
Dhe këngën e bareshës
E kujtoj mungesën e nënës
Kur jetës m`i humbi kuptimi
Vetëm babai më ngushëllonte
Me buzëqeshje pikëllimi
Ora ime nuk kishte numra
Dhe një pjesë të jetës e harroi
Tani flokët mi merr era
Por me mall atë kohë e kujtoj.
