Çaste poetike me poeten;-Sadbera Gagica SPAHIJA

EDHE SOT

————————–

Edhe sot

fluturoj me zogjtë

të këndoj cicërimën e tyre

e nesër

ata t’më vajtojnë

si një klandestinë

Edhe sot

deshta të jetoj me kujtimet e mia

me kujtimet e tua

të mbledh copëzat e dritës

që m’i la pas ikja jote

Edhe sot

s’më lë heshtja

të fle në paqe

më zgjon në mesnatë

me emrin tënd në buzë

dhe një mall

që s’di të vdesë

Edhe sot

ec nëpër gjurmët e tua

si të ishin rrugë

që më çojnë diku

ku ti je ende duke më pritur

dhe unë ende

kam ç’të të them

Edhe sot

dua të jetoj

jo për ta harruar dhimbjen

por për ta mbajtur gjallë

atë që mbeti prej teje

brenda meje

E nëse nesër

zogjtë ndalen mbi atë gur

le të mos vajtojnë

le të këndojnë

atë këngë që s’e mbarova dot

për ty

për mua

për një jetë

që edhe sot

s’më lë të iki

/QendraPress/