Fryma poetike e së martës me poeten;Neviana SHEHI

GROPËZA E VOGËL NË FAQE
——————————————————-
Gruaja me një gropëz
të vogël në faqe
dhe qerpikë të verdhë
prej hëne
bën shoqëri vetëm me erën
e mbrëmjes
dhe nuk e mbyll derën
asnjëherë pas vetes

Ne tryezën e saj ka gjithmonë
nga një dardhë
gjysmë të pjekur
dhe një lule margarite
me petale të bardhë
që s’e humb kurrë aromën

Në çastin e përballjes me të
dardha zverdhet e tëra
dhe lule margarita bëhet
edhe më e bardhë
dhe dhoma një rozë e çelur
si buzët e ndezura të gruas
me një gropëz të vogël në faqe

Ky është i vetmi çast
kur ajo nis të buzëqeshë
dhe ta ndjej edhe më shumë faktin
se gropëza e saj në faqe
dhe ora në të cilin ndodhen
janë dy nga pjesa më e dukshme
e krenarisë së saj prej gruaje
të bukur

Më vonë e marr me mend se si ajo
do t’i zhvendosë muret e dhomës
me një shtyrje të lehtë
do të nxjerr nga një kënd
një kornize të lakuar
për ta varur diku dhe për të
hyre më pas brenda saj
edhe vetë

/www.qendrapress.com/