Arrestohet një person nën dyshimet se tjetërsoi 9 hektarë pronë në vlerë rreth 10 milion euro

                                 Policia e Kosovës ka arrestuar një të dyshuar për tjetërsim të pronës në vlerë rreth 10 milionë euro. Sipas Policisë, i dyshuari A.G., në bashkëveprim me Y.H., i cili aktualisht ndodhet në arrati, ka falsifikuar dokumente, kështu duke tjetërsuar një parcelë prej 9 hektarësh, me vlerë të lartëcekur, shkruan gazeta online Reporteri.net.Pasi e kanë vendosur në emrin e tyre, dy të dyshuarit e kanë shitur pronën te pala e tretë.Lidhur me këtë rast, Policia ka kryer edhe kontroll në shtëpinë e të dyshuarit, ku ndër tjerash ka gjetur armë dhe para kesh.“Personi i dyshuar i lartcekur pas arrestimit i është nënshtruar procesit të intervistimit në prezencë të avokatit mbrojtës, dhe me vendim të prokurorit kompetent ndaj të njëjtit është shqiptuar masa e ndalimit prej 48 orësh për kryerjen e veprave penale “Falsifikim i dokumenteve”, “Legalizimi i përmbajtjes se rreme”, “Mashtrim”, dhe “Mbajtja në pronësi, kontroll ose posedim të paautorizuar të armëve””, thuhet në njoftimin e PK-së. /Reporteri.net/.

Njoftimi i plotë:

Policia e Kosovës arreston të dyshuarin nën dyshimin se ka tjetërsuar prona në vlerë rreth 10 milion euro

Prishtinë, më 25 gusht 2023

Policia e Kosovës, respektivisht Sektori për Hetime Financiare nga Drejtoria për Hetimin e Krimeve Ekonomike dhe Korrupsionit (DHKEK), me datë 25.08.2023 ka zbatuar urdhëresën e gjykatës kompetente me ç’rast është realizuar kontroll në dy lokacione të ndryshme, në një shtëpi dhe në një lokal, nën dyshimin se janë shfrytëzuar për përpilimin e dokumenteve të falsifikuara.

Hetimi lidhur me këtë rast ka filluar bazuar në autorizimin e Prokurorisë Themelore në Prishtinë pas dyshimeve të bazuara se i dyshuari A.G. mashkull/ kosovar në bashkëveprim me të dyshuarin Y. H. i cili gjendet në arrati, kanë falsifikuar dokumente dhe dyshohet se kanë arritur të tjetërsojnë një parcelë me sipërfaqe prej 9 (nëntë) hektarësh me vlerë të përafërt të tregut rreth 10,000,000.00 euro (dhjetë milion euro), me ç’rast të njëjtit pasi që kanë bartur pronat në emër të tyre i kanë parcelizuar dhe më pas i kanë shitur ato tek personat e tretë duke i mashtruar.

Lidhur me rastin gjatë kontrollit të kryer në shtëpinë e të dyshuarit janë sekuestruar dëshmitë si në vijim:
1 (një) pistoletë,
1 (një) karikator me 9 (nëntë) fishekë,
50 (pesëdhjetë) fishekë,
2 (dy) pistoleta me gas,
4 (katër) pushkë ajrore,
2 (dy) llaptopë,
1 (një) shtëpizë kompjuteri,
1 (një) telefon celular,
5680 (pesëmijë e gjashtëqind e tetëdhjetë) euro para të gatshme,
685 (gjashtëqind e tetëdhjetë e pesë) dollar amerikan,
100 (njëqind) franga zvicerane, si dhe rreth 500 (pesëqind) dosje të lëndëve të ndryshme në brendësi të të cilave kishte: Fletë poseduese, autorizime, kopje të planeve, historik të pronave, harta kadastrale (kryesisht të Regjionit të Prishtinës), vendime, kontrata të ndryshme të noterizuara të cilat dyshohet të jenë të falsifikuara. Personi i dyshuar i lartcekur pas arrestimit i është nënshtruar procesit të intervistimit në prezencë të avokatit mbrojtës, dhe me vendim të prokurorit kompetent ndaj të njëjtit është shqiptuar masa e ndalimit prej 48 orësh për kryerjen e veprave penale “Falsifikim i dokumenteve”, “Legalizimi i përmbajtjes se rreme”, “Mashtrim”, dhe “Mbajtja në pronësi, kontroll ose posedim të paautorizuar të armëve”.