Çaste poetike me poetin;-Gëzim AJGERAJ

MIZANTROPËT E ZHVLERËSIMIT

——————————————

Me zhelet, hilet dhe etjen e tyre të paetshme

ata zgjohen e flenë çdo natë.

Nuk pyesin për rrënjët e lisit,

por kërkojnë se te cili varg të fshehin kërrabëzën.

Se për të ligën e radhës u mjafton takati,

por për vlerësim të vërtetë duart u dridhen.

II.

Në mes të rrugës qëndrojnë tregtarët e zilisë,

mediokër që masin lartësinë e malit

me vizoren e tyre të thyer.

Ata tregtojnë djersën e huaj, trurin e tjetrit,

dhe çmimin e vënë sipas interesit të ditës.

Në pazarin e broçkullave,

kush u lutë më fort

shet vetveten më shtrenjtë.

III.

Por pyetja që shtrohet është kjo:

kush ua dha peshoren këtyre tregtarëve?

Kritika e tyre nuk ngre as nuk ul asgjë,

ajo thjesht tregon sa kushton sot mosdituria.

Prandaj le të flasin në pazar

lisi nuk pyet kërrabëzën

se si duhet të rritet.

/QendraPress/