Çaste poetike me poeten;Imer HYSA

PER TY NJERI

———————————

Përpiqu fjalën ta zgjedhësh të artë

e buzëqeshjen ta dhurosh pa shtirje,

ta ruash gjakfohtësinë pa u ndezur flakë

dhe kur dëgjon përgojime pas shpine.

Përpiqu ti burrë që je baba

e mbi shpatulla ke barrë të rëndë,

djallin vrastar që brenda vetes mba

vrite, mos e lër të turbullojë mendtë.

Përpiqu ti grua me bashkëshort

e lartësuar me titull “nënë fëmije”,

dashurinë njerëzore ta ruash fort

si cipë të hollë virgjërie.

Ti pushtetar që të besojmë të ardhmen

shtrij dorën e ngrohtë, mos shit mend

në fund të fundit, nje ditë të afërt a të largët

në dhomën e errët do jeshë, në dy metra vend.

Ti bisnesmen që punëson njerëz

e djersen e tyre e kthen në ar për vete,

mos luaj me mundin, jo prirje për qejfe

të ngec në fyt, të mbyt ajo bulëz djerse.

Përpiqu o njeri, fjalën ta zgjedhësh të artë

e buzëqeshjen ta dhurosh pa shtirje,

ta ruash gjakftohtësinë pa u ndezur flakë

dhe kur dëgjon të përgojojnë pas shpine.

/www.QendraPress.com/