Gjallë Jemi- Shkruan;Lumni LUSHAJ

                 Politika si terren tërheqës për mafiozët! Duke analizuar një pyetje intriguese rreth dilemës se përse mafiozët janë shpesh të tërhequr nga politika, më vërshuan disa arsye që lidhen me pushtetin, mbrojtjen dhe fitimet financiare. Gjatë tendencës për t’i përkufizuar shkencërisht arsyet kryesore pse mafiozët mund të preferojnë të përfshihen në politikë, në ndërdije portretizova disa figura të para dhe politikës që përmbushnin perceptimin tim profesional e “shkencor” për mafiozët politikanë apo politikanët mafiozë.. Duke i analizuar profilet e disa nga mafiozët që njoh dhe që kanë impakt në politikë apo janë sponsorë e miq të politikanëve mafiozë, vij në konstatimin se këto do të ishin disa nga arsyet “pse e duan mafiozët politikën”, që mund të bëhen disa përkufizime, si: Politika u ofron mafiozëve një mundësi për të kontrolluar vendimet që ndikojnë në jetën e përditshme dhe ekonominë. Duke siguruar lidhje politike, ata mund të ushtrojnë ndikim në mënyrë indirekte dhe të forcojnë rrjetin e tyre të fuqisë. Politika u jep mundësinë mafiozëve të kenë lidhje me zyrtarë të cilët mund të ndihmojnë në mbrojtjen e tyre ligjore. Ata mund të ndikojnë në organet e drejtësisë, polici dhe prokurori, duke shmangur hetimet dhe ndjekjet penale. Duke pasur ndikim politik, mafiozët mund të favorizojnë ligje ose rregullore që i japin përparësi bizneseve të tyre ose që pengojnë konkurrencën nga kundërshtarët. Përmes lidhjeve politike, mafiozët mund të kenë qasje në kontrata publike, fonde shtetërore dhe projekte zhvillimore. Kjo ndihmon në rritjen e kapitalit të tyre financiar dhe fuqizon pozitat e tyre. Me mbështetje politike, mafiozët mund të sigurojnë që veprimtaritë e tyre kriminale (si pastrimi i parave, trafikimi etj.) të mbeten të mbuluara dhe të pashqetësuara nga autoritetet. Politika i ndihmon mafiozët të mbajnë një fasadë të respektuar në shoqëri, duke fshehur aktivitetet e tyre kriminale. Ata mund të prezantohen si donatorë, filantropë ose biznesmenë, gjë që i mbron nga stigmatizimi publik. Pra, suma sumarum, politika është një terren i dobishëm për mafiozët sepse i lejon ata të fuqizojnë pozitat, të mbrohen nga ligji dhe të përfitojnë financiarisht në mënyrë të qëndrueshme. Atëherë, nëse politika është tërheqëse për mafiozët për shkak të përfitimeve të saj të mëdha si pushteti, mbrojtja nga ndëshkimi dhe kontrolli mbi ekonominë, në kontekstin e keqpërdorimit nga individë të tillë, ajo mund të shihet si një mjet për kapjen e shtetit dhe pasurimin e vetvetes në kurriz të shoqërisë. Politika në vetvete, sipas teorisë demokratike dhe idealeve të shtetit të së drejtës, është e konceptuar të jetë një mekanizëm për të përfaqësuar qytetarët, për të garantuar drejtësi, për të ndarë burimet në mënyrë të barabartë dhe për të siguruar mirëqenie për të gjithë. Kur keqpërdoret nga mafiozët ose figura të ngjashme, ajo degradon në një instrument të pushtetit të pakontrolluar dhe të pasurimit personal. Pra, në rastin e ndikimit të mafiozëve ose elementeve kriminale, politika nuk funksionon më si një shërbim publik dhe përfaqësues, por shndërrohet në një mekanizëm të kapjes së burimeve dhe mbrojtjes së interesave private. Kjo krijon një sistem ku ligjet, drejtësia dhe ekonomia janë nën ndikimin e këtyre aktorëve, duke e lënë shoqërinë pa mbrojtje efektive dhe duke shkatërruar besimin publik në institucione. Në këtë kuptim, politika, kur e keqpërdorin individët me interesa kriminale, bëhet simbol i kapjes së shtetit dhe i dështimit të demokracisë për të mbrojtur interesin publik./www.QendraPress.com/