Çaste poetike me poeten ;Bukurije Binjaku

GRATË FISNIKE!

——————————————–

Një grua zonjë, kur është zonjë

Karakter fisnik, në shpirt mirësi,

Buzëqeshje fal, por kurrë si lojë,

Në ballin e saj, lexon padjallëzi.

Ajo vë objektiva, për to veç lufton

Nuk lavdërohet, i pëlqen thjeshtë,

S’merret me fjalë, tjerët i ndihmon,

Jetën di jeton, kujtimet si vjeshtë.

Punën ka “shoqe,” për të bëhet copë

Me djersën e ballit, ndjehet krenare,

Jetës s’i trembet, si bletë punëtore,

Me Diellin në zemër, lë gjurmët e saj.

Keq atyre, s’mundet askush tu flasë

Shpirt i fuqishëm, tu përgjigjen dinë,

Janë kokëforta, sikur bota të pëlcasë,

Si ikonë Perëndie, ruajnë fisnikërinë.

Falin dashuri-mirësi, përherë pa kursim

Kur janë të drejta, kritikat dinë i pranojnë,

Nëse ua ke me hile, përballen pa hezitim,

Se o njeri! Pas shpine, kurrë s’përgojojnë.