E diela e 7 poezive dhe 7 poeteve: Behare Daja Kasa

VJESHTË

———————– 

I dashur,

Kopshti i jetës sonë nuk është më si dikur,

Është ulur vjeshta mbi pemët e tij.

Gjethet e verdha kanë rënë mbi flokët tanë,

E degët e lodhura përtojnë të zgjasin filizat e rinj.

I dashur,

Pemët tona kanë filluar dhe të thahen

E limfa e tretur mundohet t’i mbajë në jetë.

Pranvera e tyre ka kohë që ndien lodhje

Dhe mbi supet tanë tashmë ka veç vjeshtë.

Zogjtë e dimrit shtratin po bëjnë gati

E cicërimat e shpirtit po heshtin ngadalë.

Mos vallë vjeshtat ishin kaq të shqetësuara,

Sa gjurmët e tyre i lanë jo veç në kalendar?!