Fryma poetike e së dielës me poetin;-Rizah RESHANI

MALLI PËR F0TOGRAFINË E NËNËS

(Më la njëvjeçar,pa vëlla,pa motër,

e s’ arrita ta njoh as përmes fotografisë)

———————————————–

Thonë se tërë ditën korre në arë

Pastaj në mëngjes më linde

Pa mami, pa mjek, pa maternitet

Të premtën e tretë të korrikut të nxehtë.

E ninananat mê të bukura m’i këndove

Sikur më i miri poet.

Bubullima dëgjohet larg, sikur më the.

Po shiun, biro, e sjellin retë.

E, me ujëvara fjalësh më bekove

Po unë bebe, s’merrja vesh.

Në djepin e drunjtë herë qaja, herë qeshja

Si valët e jetës midis nesh.

E ike pastaj, siç ikë drita në muzg.

Kaltërsinë qiellore ma nxive me re.

Ike në stinën e pranverës se jetës

Ah, Nënë, ike, nuse e re!

Një vëlla të ma kishe lënë

Bukën kallamoçe ta ndanin përgjysmë

Një motër për morte e ditë gëzimi.

Ta merrja me kalë si Doruntinën, Konstandini.

Një fotografi të ma kishe lënë, kujtim

Ta puthja, siç puthë shiu gurët në rrugë

Në gji ta mbaja, kornizë në mur, si dritë.

Si ujë kroi, të më freskonte mushkëritë.

/QendraPress/