Fryma poetike e së mërkurës me  poetin;Gëzim AJGERAJ

Etja e lirisë

———————

Gujën e gjatë ia veshëm mendimit për nesër

pa çka se e djeshmja na gjeti goliç me natë

kush gjeti udhën me kohën i lumtë moti

nga koka, nga mendimi e morëm me të mirë dritën

i ndezëm dhe kandil për agminë e së nesërmes

që të hapërojë e bardhë e lum e bardha

nga ashti, nga dejet e ushqyem me qumështin e shpirtit

e rritëm në gëzofin e shpirtit të mos na mërdhinte etja

pa çka se veten dogjëm për shkëlqimin e saj

ajo erdhi nusërore në kullën e gurtë

sa do pritat e shekujve ia kishin skuqur duvakun

shkëlqeu e bardhë mbi Dardani

Shkëlqimi i fjalës

—————-

Në logun e fjalës

ngritëm kalanë e mendimit

e nesërmja shpalosi buzëqeshjen

me agun e dritës

edhe drita e saj në fundin e tunelit

ia pati lakminë

thonë se pa shkëndijën e saj

nuk ndizen as qirinjtë e dritës

ajo matet me diellin

e prek majat e qiellit

Pa dritën e saj

verbëria merr krahë e tërbohet

Me të shtigjet e errëta

marrin dritë

/www.QendraPress.com/