E diela poetike me poeten:-Emine Konushevci -DURMISHI

HESHTJA QË TROKET

——————————

Sonte shiu troket pikë-pikë në dritare,

si një zë i vjetër më vjen dhe përsëritet;

nga kohë të largëta më sjell kujtime,

kur lotët, si shiu, me fytyrën puthiten.

Sa kohë ka kaluar, dhe prapë se prapë,

asgjë s’është tretur në mjegullën e viteve;

ato çaste rrinë ende, të ngrohta e t’njoma,

si pikat që rrëshqasin sonte n’dritaren time.

Dhe shiu sonte flet me heshtjen e vet,

sikur etjen e mallit të kohës e shuan;

heshtja e tij më shumë se fjalët thonë,

kur zemra lodhet dhe kujtimi s’pushon.

Dhe ndonjëherë mendoj se shiu e di,

i njeh çdo heshtje, çdo dhimbje e mall;

prandaj troket ngadalë, pa zë e pa fjalë,

risjell atë që zemra e ruan si të gjallë.

Mundohem çdo pikë shiu ta numëroj,

dhe kohën e saj me emër ta pagëzoj…

/QendraPress/