Çaste poetike me poetin;-Safet SYLA

MIRË SE VINI ÇLIRIMTARË

——————————————-

Në korridoret e ftohta të burgut të Hagës,

Presin yjet me zemra të rënduara,

Aty ku liria po shkruhet,

Me gjakun e bijve në faqet e historisë.

Mirë se vini, Çlirimtarë!

Sepse nuk mbyllet qielli mbi Drenicë,

Nuk prangoset shqiponja,

Nuk vihet dry mbi lavdin e një kombi.

Haga ju mbajtën pas hekurave,

E Kosova ju mbajti në zemër,

Ju numëruat ditët mbi muret e ftohta,

Ndërsa ne numëruam netët mbi fotografi,

E çdo fotografi u bë një dritare e kthimit.

Nëse drejtësia është një shpatë,

Le të presë vetëm nyjën e së vërtetës,

Nëse historia është një lumë,

Le të mos ia ndërrojë askush shtratin,

Sepse lumi i gjakut e di vetë rrugën drejt detit.

Kosova po ju pret me këngën e lirisë,

Me emrat e rrugëve që i shkelët dikur,

Me varret që ende ruajnë emrat e Dëshmorëve,

Me fëmijët që mësuan fjalën UÇK.

Po ktheheni nga vitet e gjata të historisë,

Me ju kthehen hijet e shokëve të rënë,

Me ju kthehet një copëz e asaj pranvere,

Që e mbolli lirinë mbi tokën e Kosovës.

Le të bjerë sonte perdja e pritjes,

Le të çahet qielli mbi Hagë,

Kosova do t’ju pretë me lotë gëzimi,

Duke ju thënë mirë se vini bijtë e mi…

Se vendi juaj nuk ju ka harruar

Ju ishte këtu në zemrën time,

Aty ku asnjë gjykatë nuk mund ta burgosë,

 Lirinë të cilën e sollët ju.

/QendraPress/