Çaste poetike me poetin:-Ismail XHAFERI

Baladë për Shote Galicën

————————————

Tundet një gërshet mbi supe,

Tundet si gjalmi mbi pushkë,

Ç’është kjo vajzë, ç’është kjo grua,

Që i nis burrat në luftë?!

Vetëm pesëmbëdhjetë vjeçe,

U bë nuse për lirinë,

Një dyfek e një gjerdan,

Pajë e saj për nusërinë.

Trimëresha e Drenicës,

Drenushë që s’kishte shoqe,

Ditën gdhihej si kaçake,

Natën ngrysej si bashkëshorte.

Thonë se u bë shqiponjë

Luftrave mbi shkjaj të zinj,

Grua, burrë dhe komandante

Në Drenicë e Dukagjin.

O, prite Azem Galicën,

Shtigjeve nga vjen liria,

Brenda zemrës kish Azemin,

Kish amanetet e tija.

Brenda zemrës kishte ëndrra,

Kishte dufe, kishte zjarre,

Kishte plagët e Kosovës,

Kishte nënat kosovare.

Ende Shota rend në male,

Se është Shotë dhe s’mund të vdes,

Tundet një gërshet mbi supe,

Ngjishet një gjerdan në brez.

/QendraPress/