Fryma poetike e së dielës me poetin;-Gazmend BEQAJ

AMANETI I BABËS

————————-

Pa shkelë këmbë e gjermanit

S’do çlirohet kurrë kjo tokë

Më thoshte babai

Në shtratin e heshtjes

E mos më mrrift ymri kohën

Kur shqiptari do udhëheq këtë shtet

Se jemi mësu me na udhëheq të tjerët

E jo të udhëheqim vet…

Gjersa ora vazhdoj trokitjen ngadalë

E në sytë e tij shuhej jeta

Mbeta i shtangur

Duke mos e kuptuar a fliste përçart

Apo fjala e tij ishte amanet

Derisa përsëriste

Shpërthimin përfundimtar të kthjelltësisë

Me përvojën e afërt me vdekjen…

Por tash shumë vite më vonë

Kur ende pa fituar luftën me armikun

Nisëm luftën mes veti

Kur për pak më shumë pushtet

Rrezikojmë krejt një shtet

E kuptoj se fjalët e babës

Nuk ishin pështjellim emocionesh

Por një amanet

Se si duhet të mbrohet e të rritet një shtet

/QendraPress/