Çaste poetike me poeten;-Elmira RAMA

Kur zemërimi bëhet melodi

—————————————-

S’u trembem ditëve të nxehta,

as ngricës së akullt kur portat m’i mbyll.

Errësirën s’e urreva kurrë, ndërsa dritën…

ah, dritën e desha si të vetmin yll.

Në gjykimin tim s’ka të dënuar.

Me keqardhje e shoh edhe xhelatin,

e lutem për të.

E vështroj me butësi persekutorin, edhe kur,

në skutat e poshtërsisë së tij, më degdis pa zë.

Dhe nuk zemërohem me zemërimin tim.

E ndiej tek zbutet,

tek bëhet melodi,

sa herë i tregoj një përrallë,

sa herë që shkruaj një poezi

/QendraPress/