Çaste poetike me poeten:Rozafa SHPUZA

Baladë

(moshatarëve të mi)

—————————-

Ata presin përhanshëm bri limanesh të njelmët

dekorua prej direkësh simetrikë

në qasje t’nji shkalle që s’dihet për kah naltohet.

Presin

e rreken me deshifrue kodet e atij farit

që kurrë s’e panë, veç e imagjinuen

tue hamendësue shkujdesun ndër rreshta ditarësh

a iniciale sekrete gdhendun mbi banka shkollash.

Presin

e frymojnë skajshëm si andrrimtarë kryeneçë

tue u lumnue prore prej shiut që u kujton

dashnitë e pamujtuna.

Presin

teksa zhumhuri i zbaticave ua përpinë

kalvarin e rrugëtimit prej kah janë nisë,

aromën e shpisë së vjetër

që mbahet në kambë prej rrjeta marimangash,

fotografitë bardhezi t’stivueme trishtaz

ndër kuti këpucësh që i veshën për parada maji,

hijet e qipariseve bri muranash me lule të vyshkuna…

Ata presin përhanshëm bri limanesh të njelmët

e këndojnë nën za nji melodi shpirti.

/ëëë.QendraPress.com/