Çaste poetike me poeten;-Drita Rubjeka ZENELI

Liqeni i Shkodrës

——————————

Në skenën e madhe liqeni këndoi jaret e qytetit,

Me zërin e erërave që zbresin nga malet,

Me lahutën e kallamishteve,

Në festë me lumenjtë dhe detin,

Me flatërbardhët valltarë, shpendët shtegtarë,

Me yjet që shuajnë etjen netëve të verës,

Në skenën plot dritë që lind mbi Tarabosh,

Me agimet e hershme të peshkatarëve,

Nën retë e bardha, spektatorë të lartësive,

Në brinjën e baladës së gurit,

Përzier me qumështin e përjetshëm të Rozafës,

Pranë djepit që e nanurit prej shekujsh me jare,

Syri blu i kufijve,

Me frizurë zambakësh uji,

O këngë e natyrës,

Me medalionin blu të qëndisur në trofetë e botës…

/QendraPress/