Çaste poetike me poeten;-Elida PRIFTI

Dielli i Miqësisë

Baladë filozofike

———————————-

Kur zbehet shpresa në udhët e njerëzisë,

si yll i gjallë miqësia ndriçon;

është dielli i heshtur i universit,

që natën e urrejtjes në ag e shndërron.

S’matet me ar, as blihet me pushtet,

si rrap i lashtë i përballon stuhitë;

nga rrënjët e saj buron veç paqja,

si krua i kthjellët që shuan etjet.

Çdo zemër fsheh një tempull të padukshëm,

ku fjala e mirë bëhet altar;

kur dora zgjatet për të falur plagët,

edhe guri mëson të bëhet zjarr.

Prandaj sot, në Ditën e Miqësisë,

ta mbjellim paqen si farë përjetësie;

se dielli që s’perëndon në zemrat tona,

është drita e amshuar e miqësisë.

/QendraPress/